शेवगाव व्हेंटिलेटरवर ! कोविड रुग्ण, लसीकरण वाऱ्यावर; डॉ. काटे, डॉ. परदेशी खासगी प्रॅक्टिसमध्ये व्यस्त

शेवगाव, बोधेगाव ग्रामीण रुग्णालय व्हेंटिलेटरवर

लोकमान्य स्कॅन सेंटर, अथर्व हॉस्पिटलमध्ये भागीदारी असल्याचा आरोप 

तहसीलदार, जिल्हाशल्यचिकित्सक, जिल्हाधिकारी यांच्याकडे तक्रार

शेवगाव - शेवगाव ग्रामीण रुग्णालयातील वैद्यकीय अधीक्षक रामेश्वर काटे व बोधेगाव येथील ग्रामीण रुग्णालयाचे वैद्यकीय अधिकारी डॉ. दीपक परदेशी हे दोघेही सरकारी नोकरीत आहेत. तरीही ते बेकायदेशीरपणे पूर्णवेळ खासगी प्रॅक्टिस करत असल्याचा आरोप करण्यात आला आहे. 

या डॉक्टरांची चौकशी करण्याची मागणी कुद्दुस बिबन पठाण यांनी तहसीलदार, जिल्हा शल्यचिकित्सक व जिल्हाधिकारी यांच्याकडे तक्रार अर्जाद्वारे केली आहे. या दोघां डॉक्टरांच्या बेजबाबदार वर्तणुकीचा मानसिक, शारीरिक व आर्थिक फटका गरीब, गरजू रुग्णांना बसत आहे. त्यामुळे वैद्यकीय क्षेत्रासह संपूर्ण तालुक्यात एकच खळबळ उडाली आहे.

कुद्दुस पठाण यांनी तक्रार अर्जात म्हटले आहे, की डॉ. रामेश्वर काटे हे वैद्यकीय अधिकारी म्हणून सरकारी सेवेत पगार घेत असताना ते खासगी युनिटी स्कॅन सेंटर मध्ये पूर्णवेळ काम कसे काय करू शकतात? तसेच ते या ठिकाणी डायरेक्ट बॉडीत आहेत काय? आणि असतील तर त्यांना कायद्याने तशी परवानगी आहे काय, असा सवाल केला आहे. 

तसेच डॉ. विकास बेडके यांच्या अथर्व हॉस्पिटलमधील कोविड सेंटरमध्ये डॉ. काटे हे भागीदार आहेत काय? त्यांना तशी कायदेशीर परवानगी आहे काय, ही माहिती विचारली आहे. डॉ. काटे ग्रामीण रुग्णालयात खूप कमी वेळ उपस्थित असतात. ते नेहमी अनुपस्थित असतात. 

लोकमान्य स्कॅन मधील खासगी प्रकटीसमध्येच ते पूर्णवेळ व्यस्त असल्याने ग्रामीण रुग्णालयात येणाऱ्या रुग्णांची मोठ्या प्रमाणात हेळसांड होते. तसेच येथे कोव्हीड लसीकरण, कोरोना तपासणी याचा पूर्णपणे बोजवारा उडालेला आहे. 

याशिवाय डॉ. दीपक परदेशी हे देखील बोधेगाव येथे वैद्यकीय अधिकारी म्हणून कार्यरत असताना ते अथर्व हॉस्पिटलमध्येच त्यांची पूर्णवेळ बालरोगतज्ज्ञ म्हणून ओपीडी पहातात. तसेच येथे फिजिशियन म्हणून देखील कार्यरत असल्याने त्यांना कायदेशीर परवानगी आहे काय? असा सवाल उपस्थित केला आहे. 

तसेच डॉ. परदेशी हे बोधेगाव रुग्णालयात कधीच नसतात, अशी ओरड या परिसरातील लोकांची आहे. अनेकांना असाच अनुभव येत आहे. यासाठी काही सामाजिक संघटनांनी आंदोलने देखील केली आहेत. ते नेहमी शेवगावलाच असतात.

कोरोना संकटात हे दोघेही वैद्यकीय अधिकारी खासगी उद्योगात व्यस्त असल्याने तालुक्यातील गरजू रुग्णांची मोठ्याप्रमाणात हेळसांड होत आहे. तसेच त्यांची बेकायदेशीर खासगी प्रॅक्टिस बंद करून त्यांच्यावर योग्य ती कायदेशीर कारवाई करावी, अशी मागणी करण्यात आली आहे.

जिल्हाधिकाऱ्यांच्या आदेशाला केराची टोपली

कोरोना काळात आपले नियुक्ती चे ठिकाणीच हजर रहावे, असे आदेश जिल्हाधिकारी यांनी काढलेले आहेत. मात्र तसे असताना डॉ. परदेशी बोधेगाव सोडून कायम शेवंगावमध्येच असतात. ते राहायला देखील शेवगाव मध्ये आहेत. 

मग, यावेळी बोधेगाव रुग्णालयात येणाऱ्या आणि अत्यवस्थ रुग्णांना ऐनवेळी उपचार कसे देऊ शकतात?  तसेच डॉ. काटे हे खासगी प्रॅक्टिस मध्ये गुंतलेले दिसून येतात. त्यामुळे या दोन्ही सरकारी पगार घेणाऱ्या अधिकाऱ्यांनी जिल्हाधिकारी यांच्या आदेशाला थेट केराची टोपलीच दाखविल्याचे दिसून येत आहे.

अथर्व हॉस्पिटलच्या डायरेक्टर बॉडीत कोण ? शेवगाव शहरातील डॉ. विकास शंकर बेडके यांनी गेल्या काही वर्षा पासून सुरु केलेल्या अथर्व हॉस्पिटल मध्ये डायरेक्टर बॉडी मधील नावाची यादी व त्यांच्या खासगी कोविड सेंटर मधील बॉडीतील नावाची यादी मिळावी, यासाठी देखील पठाण यांनी तहसीलदार व जिल्हाशल्यचिकित्सक यांच्याकडे तक्रार अर्ज केला आहे. अथर्व हॉस्पिटलच्या बॉडी मध्ये सरकारी नोकरीत असणारे काही जण असल्याचा आरोप पठाण यांनी केला आहे. ज्या व्यक्ती सरकारी यंत्रने मध्ये पगारी डॉक्टर म्हणून काम करीत असतील तर त्यांना अश्या प्रकारे कुठल्याही खासगी हॉस्पिटल मध्ये भागीदार अथवा इतर जबाबदारीवर काम करण्याची कायदेशीर परवानगी नाही. तसेच या हॉस्पिटल मध्ये फिजिशिअन डॉक्टर म्हणून कोणाची नियुक्ती आहे याची माहिती देखील मागितली आहे.

उद्या वाचा... 

अथर्व हॉस्पिटलला 'बोगस' परवानगी ?
अधिकाऱ्याशी तडजोड करणारा बोधेगावचा 'तो' डॉक्टर कोण ?