पुणे - भारताने इंग्लंडविरुद्ध रविवारचा अखेरचा एकदिवसीय सामना जिंकला खरा. पण तरीही हा विजय भारताला म्हणावा तितका सहज सोपा मिळवता आलेला नाही. कारण या सामन्यात हार्दिक पंड्याकडून काही चुका झाल्याचे पाहायला मिळाले.
या सामन्यात आपल्या हार्दिकची एक चुक भारताच्या संघाला चांगलीच भोवली. कारण हार्दिककडून ही चुक झाली नसती तर हा सामना अखेरच्या षटकापर्यंत गेलाच नसता. नेमकं काय घडलं ? ते वाचाच..
इंग्लंडच्या सॅम करनने अक्षरशः अखेरच्या चेंडूपर्यंत हा सामना जिवंत ठेवला. या सामन्यात करनने नाबाद ९५ धावा केल्या. त्याने भारताला चांगलेच झुंजवले. पण हार्दिकच्या एका चुकीमुळे हा सामना अखेरच्या चेंडूपर्यंच खेळवला गेला. हे वास्तव होते.
या सामन्याच्या ३४ व्या षटकात भारताचा युवा वेगवान गोलंदाज प्रसिध कृष्णन गोलंदाजी करत होता. या षटकाच्या पाचव्या चेंडूवर एक अनपेक्षित गोष्ट घडली. या चेंडूवर सॅम करनने उत्तुंग फटका खेचला होता.
आता नेमकं काय होणार, याची सर्वांना उत्सुकता होती. पण सॅमनने जिथे चेंडू मारला, तिथे भारताचा अष्टपैलू हार्दिक पंड्या उभा होता. हार्दिक यावेळी चेंडूच्या दिशेने धावत निघाला. हा चेंडू हार्दिकच्या हातामध्येही विसावला देखील. पण तितक्यात...
हार्दिकच्या हातात आलेला चेंडू उडला आणि तो मैदानात खाली पडला. त्यानंतर हार्दिकला या चेंडूला अडवताही आले नाही, आणि तो चेंडू सीमेपार (चौकार) गेला. हार्दिकने यावेळी सॅमला जीवदान दिल्याचे पाहायला मिळाले.
सॅमला हे जीवदान मिळाले तेव्हा तो २२ धावांवर खेळत होता. या जीवदानाचा त्याने चांगलाच फायदा उचलला. सॅमने फक्त अर्धशतकच साकारले नाही, तर अखेरच्या षटकापर्यंत हा सामना घेऊन गेला. त्याच्यामुळे भारताला विजय जड गेला.
या सामन्यात हार्दिककडून दोन झेल सुटले. याच सामन्यात बेन स्टोक्सचाही सोपा झेल हार्दिक पंड्याकडून सुटला. सामन्यातील षटकाच्या चौथ्या चेंडूवर इंग्लंडच्या बेन स्टोक्सने जोरदार फटका मारला. त्यावेळी काय होईल, याची उत्सुकता होती.
पण काही क्षणात हा चेंडू हार्दिक पंड्याच्या हातात विसावणार आणि भारतीय संघाला मोठे यश मिळणार, असे दिसत होते. कारण हा अतिशय सोपा झेल होता. त्यामुळे हार्दिक हा झेल पकडेल, असे वाटत होते. पण तसे झाले नाही.
बेन स्टोक्सला जीवदान मिळाले. त्यावेळी स्टोक्स हा १५ धावांवर खेळत होता. हा झेल सुटला त्यावेळी विराट कोहली हा देखील निराश झालेला दिसला. पंड्याला देखील त्याच्या चुका महागात पडल्याचे जाणवले. म्हणून त्याने हात जोडून सर्वांची माफीही मागितली.
