गडचिरोली पोलीस दलाची अभिमानास्पद कामगिरी
गृहमंत्री अनिल देशमुख यांची माहिती
मुंबई : नक्षलदृष्टया अतिसंवेदनशिल मानल्या जाणाऱ्या भामरागड उपविभागांतर्गत येणा-या मुरुमभुशी गावाजवळील महाराष्ट्र-छत्तीसगढ़ सीमेवरील जंगल परिसरात गडचिरोली पोलीस दलाने विशेष नक्षलविरोधी अभियान राबवुन नक्षल कॅम्प उदध्वस्त करण्याची अभिमानास्पद कामगिरी केली. त्याबद्दल त्यांचे गृहमंत्री अनिल देशमुख यांनी मनःपूर्वक अभिनंदन, केले आहे.
या पथकाचे जवान (सी-६०) नक्षलविरोधी अभियान राबवित होते. सलग २ दिवस राबविलेल्या अभियानात ०४ मार्च च्या पहिल्याच दिवशी पथकाला संशयास्पद नक्षल दलम आढळून आले. नक्षल वाद्यांनी प्रथम पोलीस जवानांवर गोळीबार केला. जवानांनी त्यास चोख प्रत्युत्तर देत गोळीबार केला. त्यामुळे माघार घेत नक्षलवाद्यांनी घनदाट जंगलाचा फायदा घेत पळ काढला.
त्या भागात शोध मोहीम राबविली असता, त्या परिसरात नक्षल वाद्यांनी लावलेला मोठा कॅम्प आढळला. तो कॅम्प सी-६० जवानांनी उध्वस्त करुन टाकला तसेच त्या कॅम्प मध्ये शस्त्र बनविण्याच्या मशिनरी, स्फोटके व हत्यारे आदी साहित्य सापडले. ते ही सी-६० जवानांनी जप्त केले. परत येत असतांना सी-६० पथकावर पुन्हा नक्षलवाद्यांकडून जोरदार गोळीबार झाला. त्यास पोलीस पथकाने प्रत्युत्तर दिले. तेव्हा नक्षलवादांनी जंगलात पळ काढला.
सदर जंगल परिसरात नक्षल्यांचा शस्त्र तयार करण्याचे साहित्य आढळल्याने त्या भागात नक्षल असल्याचा संशय बळावला. त्यामुळे दुसऱ्या दिवशी ०५ मार्च रोजी पुन्हा त्याच भागात अभियान तीव्रपणे राबविण्यासाठी आणखी विशेष अभियान पथक (सी-६०) घटनास्थळावर पाठविण्यात आले.
विशेष अभियान पथकाच्या दोन्ही समुहांवर पुन्हा नक्षलवाद्यांनी जोरदार गोळीबार केला. तेव्हा सी-६०च्या बहादुर जवानांनी नक्षलवाद्यांच्या हल्ल्याला जोरदार प्रत्युत्तर दिले. यात नक्षलवाद्यांचे मोठ्या प्रमाणात नुकसान झाले.
सी- ६० पथकाच्या उत्कृष्ट अभियान रणनिती व बळाच्या जोरावर नक्षलवाद्यांना पळवून लावण्यात जवानांनी यश मिळविले.
नक्षलवाद्यांचा बालेकिल्ला म्हणून समजल्या जाणाऱ्या अबुझमाड सारख्या नक्षलीदृष्टया अतिसंवेदनशील भागात जाऊन सी-६० च्या बहादुर जवानांनी नक्षलचे मोठया प्रमाणात नुकसान केल्यामुळे माड भागातील नक्षलवादाला जबर हादरा बसला. याचा फायदा तेथील नक्षली कारवाया कमी होण्यास नक्कीच होईल, असा विश्वास देशमुख यांनी व्यक्त केला आहे.
