'कॅप्टन कूल' महेंद्रसिंग धोनीची क्रिकेटमधून निवृत्ती

नवी दिल्ली - भारतीय क्रिकेट संघाचा माजी कर्णधार महेंद्र सिंह धोनी याने आंतरराष्ट्रीय क्रिकेटमधून कायमची निवृत्ती घेत असल्याची घोषणा केली. शनिवारी धोनीने इंस्टाग्रामवर व्हिडिओ शेअर करत सांगितले की, "तुमचे प्रेम आणि पाठिंब्यासाठी धन्यवाद. आज संध्याकाळी ७. २९ पासून मला निवृत्त झालो असल्याचे समजा". विशेष म्हणजे धोनीने निवृत्तीची घोषणा करताच क्रिकेटर सुरेश रैना यानेही त्याच्या निवृत्तीची घोषणा केली.

भारताला २८ वर्षानंतर विश्वचषक जिंकून देणाऱ्या 'कॅप्टन कूल' महेंद्र सिंह धोनीने इंस्टाग्रावर एक व्हिडिओ शेअर करुन ही माहिती दिली. धोनीच्या निवृत्तीनंतर त्याच्या चाहत्यांना मोठा धक्का बसला आहे. सन २०१९ मध्ये झालेल्या विश्वचषकाच्या सेमी फायनलपासून महेंद्रसिंग धोनी मैदानात उतरलेला नाही. 

 हेही वाचा : अन्यथा धोनीसाठी ‘टीम इंडिया’चे दरवाजे कायमचे बंद

यादरम्यान त्याच्या क्रिकेटमधून निवृत्तीवर अनेक चर्चा झाल्या. पण, धोनीने कधीही यावर प्रतिक्रिया दिली नाही. 'नेहमी प्रसिद्धी आणि कॉन्ट्रोव्हर्सीपासून दूर राहणे' ही धोनीची खासियत आहे. स्वातंत्र्यदिनी सर्वांना सुटी असते. आपल्या चाहत्यांना माहिती देण्यासाठी धोनीने ही तारिख निवडली. 

धोनीच्या नेतृत्वात भारतीय क्रिकेट संघाने अनेक सामने जिंकले. सन २००८ ते २०१४ दरम्यान धोनी कसोटी सामन्यांचा कर्णधार होता. त्याने २००७ साली झालेल्या विश्वचषक स्पर्धेत टी-२० विश्वचषक जिंकला होती. सन २०१० आणि २०१६ साली त्याने आशिया कप जिंकला आहे. सन २०११ साली त्याच्या नेतृत्वात भारतीय क्रिकेट संघाने विश्वचषक स्पर्धा जिंकून जगज्जेता झाला होता.

महेंद्रसिंग धोनीच्या नेतृत्वात भारतीय संघाने सन २०१३ साली आयसीसी चॅम्पियन्स ट्रॉफीदेखील जिंकली होती. धोनीने आंतरराष्ट्रीय क्रिकेटमधील शेवटचा सामना सन २०१९ मध्ये विश्वचषकातील उपांत्य फेरीत न्यूझीलंड विरुद्ध जूलैमध्ये खेळला. त्यानंतर तो पुन्हा मैदानात दिसलाच नाही.